Dorp/Stad waar jy woon:

Komatipoort, Mpumalanga

Beroep:

Onderwyseres

Hoekom skryf jy in vir SARIE Voorbladgesig?:

Ek skryf weer in vir SARIE Voorbladgesig, al het ek al voorheen probeer en nie verder gekom nie. Elke keer was dit eerlikwaar ‘n knou vir my selfbeeld, en elke keer het die stemmetjie van twyfel bietjie harder geraak. Maar dalk is dit presies hoekom ek weer probeer.
As onderwyser leef ek elke dag tussen kinders wat opkyk na die mense rondom hulle. Ek leer hulle om nie op te gee wanneer iets moeilik raak nie, om weer op te staan nadat hulle geval het, en om steeds in hulself te glo selfs wanneer ander dit nie doen nie. Ek besef ek kan nie net daardie woorde vir hulle sê nie, ek moet dit ook leef.
Hierdie inskrywing gaan vir my oor meer as net ‘n foto of ‘n kompetisie. Dit gaan oor moed. Oor selfvertroue wat nie altyd vanself kom nie. Oor die keuse om weer te probeer, al is jy bang om teleurgesteld te word. Ek wil vir my leerders wys dat ‘n mens nie deur mislukking gedefinieer word nie, maar deur hoeveel keer jy bereid is om weer op te staan.
Ek glo ook dat alles in die Here se hande is. Party deure maak Hy oop, ander bly toe, maar elke ervaring leer ons iets. As hierdie geleentheid deel is van Sy wil vir my lewe, sal dit gebeur op die regte tyd en op die regte manier. En as nie, sal ek steeds dankbaar wees dat ek die moed gehad het om weer te probeer.
‘n Aanhouer wen. Nie omdat dinge altyd maklik uitwerk nie, maar omdat ware krag lê in die besluit om nie op te gee nie.
As ek net een leerder kan inspireer om weer in hulself te glo, dan het hierdie reis reeds vir my betekenis gehad.

Jou gunsteling-woord in Afrikaans?:

Verwondering — die gevoel van stil raak oor God, natuur en die lewe.

3 woorde wat jou goed opsom:

Saggeaard, Kreatief, Bosveldsiel