Dorp/Stad waar jy woon:

Brits

Beroep:

Onderwyseres

Hoekom skryf jy in vir SARIE Voorbladgesig?:

My naam is Cherene Olivier, en dit is vir my ’n voorreg om aan Sarie Voorblad Gesig deel te neem – ’n platform waarvoor ek glo ek bestem is. As ’n passievolle vrou wat die lewe liefhet, sien ek hierdie reis nie net as ’n persoonlike droom nie, maar ook as ’n geleentheid om ander vroue te inspireer en te bemoedig.

Ek is die trotse ma van drie pragtige kinders wat my lewe vul met liefde en vreugde. My man werk die afgelope vier jaar in Amerika, en alhoewel dit nie altyd maklik is nie, het dit my sterker, meer onafhanklik en meer vasberade gemaak.

Ek is al vir twaalf jaar ’n toegewyde onderwyseres – ’n beroep waarin ek my hart en siel uitleef. Vir my is onderwys nie net ’n werk nie, maar ’n roeping. Ek sien elke kind as ’n geleentheid om die wêreld ’n bietjie beter te maak.

Ek het onlangs 75 kilogram verloor en hierdie transformasie was vir my nie net fisies nie, maar ook emosioneel en geestelik. Dit het my geleer om myself lief te hê, deur te druk wanneer dit moeilik raak, en weer balans in my lewe te kry. Ek wil my storie gebruik om ander vroue te wys dat dit moontlik is – jy kan weer kies om jouself eerste te stel, om te groei, en om met selfvertroue te leef.

Sarie Voorblad Gesig is vir my meer as net ’n kompetisie – dis ’n kans om terug te gee. Ek wil ’n stem wees vir elke vrou wat al ongesiens, ongehoord of onwaardig gevoel het. Ons is almal waardig, mooi en in staat om met trots en vreugde te leef.

Jou gunsteling-woord in Afrikaans?:

Ongeag

3 woorde wat jou goed opsom:

uniek, spontaan, liefdevol